Mwana wekutorwa neshiri mutano

0
364

MWANA uye wekuGokwe wekumbotorwa neshiri ikaenda naye mudenga, ndokuzomudonhedza apo ainge arere mumunda vabereki vake vachisakura, anonzi mutano uye ari kukura zvakanaka.

Kwayedza gore rapera yakaburitsa nyaya yemwana uyu, Takudzwa Kuyana (2), anogara nevabereki vake mubhuku raMakore, kwaMambo Nembudziya achinzi akatorwa neshiri paainge akarariswa, ikabhururuka naye mudenga, ndokuzomudonhedza.

Loading...

Paakadonhedzerwa pasi neshiri iyi, anonzi haana kukuvara uye akanonhongwa naamai vake avo vakamuwana achitonyemwerera.

Vabereki vaTakudzwa ndiVaCosmas Kuyana (28) nemudzimai wavo, Barbra Nzou (23).

Vachitaura svondo rapera, VaKuyana vanoti vanofara kuti mwana wavo ari kukura zvakanaka mushure meshura iri.

“Mwana wedu ari kukura zvikuru pasina kana dambudziko uye mutano. Zviri kutaurwa nevanhu muno zvatinonzwa vamwe vachiti akarumwa nezizi vamwe vachiti anofuma akarara panze kunyepa.

Vanhu vanoda kusvibisa zita redu, hongu mwana akambotorwa neshiri zvikashamisa dunhu rose. Asi takazobatsirwa nen’anga zvikapera,” vanodaro VaKuyana.

Vanoti mushure mechiitiko ichi, kwakazouya n’anga ikabvisa zvinhu mumusha mavo apo vakaudzwa kuti yaisava shiri yakange yatora mwana uyu, asi kuti zvaiva zvikwambo.

“Hongu, maporofita vakauya asi vakazobatsira mwana uyu in’anga nekuti maporofita vakanga vatadza. Pamusha pedu hapana dambudziko, izvozvi amai nemwana vaenda kuchechi.”

Mukoma waVaKuyana, VaTinashe Kuyana (33), vanoti Tafadzwa haana dambudziko.

“Ichokwadi chiitiko chekutorwa kwemwana uyu neshiri chakashamisa nyika yose zvinoita kuti tisazvikanganwe. Asi dambudziko hapana kunze kwendangariro chete,” vanodaro.

VaZesa Makore (39), vanova babamukuru vaTafadzwa zvakare, vanotsinhira mwana uyu ari kukura zvakanaka.

“Mwana atokura uye haarware. Zvemashoko evanhu vanofamba vachiti akarumwa nezizi vamwe vachiti ave kufuma arere panze, ndivo varoyi vanoshuvira zvakaipa,” vanodaro.

Ambuya vaTafadzwa, Mai Easther Kuyana (68), vanoti vanofara zvikuru. Zvakadaro, Madzibaba Biton Mumba (23) veJohane Masowe weChishanu vanoti mwana uyu anofanirwa kugara achiyereswa nguva dzose nekuda kwedambudziko raakasangana naro iri.

Comment with your Facebook

comments

Loading...